KARAMBOLA: Gugmang Nagkayamukat

Dapit: Tunga-tunga sa Visayas ug Mindanao
Tuig sa Hitabo: Bag-o ug Daang Tuig

Maayong Gabidlaw mga Bisdakers!

Hinaut unta nga kahatagan ug panahon kining akong tampo, kay basin pa makutlu-an ug mga pagtulun-an ug matagaan pud ug katin-awan ang mga kalibog ug pangutana. Mao kini ang storya…

Dunay managtrato nga midagan na ug unom katuig ang ilang relasyon. Nagkalagyo ang managtrato kay mibisita sa ilang lugar ang babae ug didto sa ilang dapit nahimamat niya ang usa ka langyaw ra pud niadtong dapita. Nagkahigalaay dayon ang duha. Itago lang nato sa ngalan nga Belen ang babae. Ug isip usa ka maayong tawo, gi-atiman pud ni Belen ang lalaki nga si Mario sa panahon nga mobisita kini sa iyang balay. Ug naa pud higayon nga manuroy sila. Sweet ug caring kayo si Mario, ganahan magpakatawa, maayo pud mopahalina ug storya ug maayo pud mo-kus-kos ug gitara.

Sa laing bahin, si Belen adunay uyab nga si Doming. Hitsuraan ug sapian apan pirti ka sugarol lang, luyo niini hilabihang higugmaa ni Belen sa iya. Usahay malimtan na lang niya nga duna diay sila lakaw ni Belen tungod kay malingaw gyud siya magsige ug hapyod sa iyang manok. Apan ok ra gihapon kang Belen kay iya man gihigugma si Doming. Ang hulip ni Doming sa iyang mga kakulangon kang Belen mao ang mga mahalon nga butang isip regalo, isuroy niya sa mga dagkong tindahan ug dal-an ug ilimnon ang amahan ni Belen. Pero grabe gyud ka sugarol ni si Doming.

Ang akong higala nga si Mario duna usab kini uyab sa ilaha nga ginganlan ug Minerba. Sulod sa pito ka tuig, maayo ang ilang
relasyon. Walay away kay pareho man nga masinabtonon ang duha. Apan! Niining maong bakasyon ni Mario sa among dapit ni Belen, natingala na si Minerba nga talagsa naman lang magtawganan sa iya iyang uyab mao nga siya na lang ang nangita ug paagi kung unsaon nga makontak kini matag karon ug unya. Si Belen mao lang ang sekreto nga wala ikatug-an ni Mario kang Minerba.

Tungod sa mga panahon nga kanunayng magkauban sila Mario ug Belen, wala malikayi ni Mario ang mahulog ang iyang buot sa babae ug miabot gyud sa panahon nga naglibog na siya kung gugma ba ang iyang gibati ngadto sa babae.

Nahibaloan ni Doming ang maong mga hitabo ug pirting sukua niya. Wala man lang gani nangutana o nakisayod kang Belen sa tinood nga kahimtang iya dayong gihinginlan ang babae ug gikwentahan sa iyang gasto nga pirting dakua na. mikabat na daw ug sobra 100,000 pesos apil na daw ang pagpalit ug ilimnon para sa papa ni Belen. Naulaw kaayo si Belen kay wala siya magtoo nga mabuhat kadto ni Doming. Nakurat si Mario sa hitabo (naglibog sa iyang gibati) ug tungod kay gusto niya nga tabangan si Belen, iyang giingnan si Doming nga siya na lang ang mobayad ug andam siya nga mopakasala kang Belen.

Sa maong higayon, naa sa maong lalis si Ilyong nga suod nga higala ni Belen. Ug siya ang mipatunga sa init nga debate. Tood man, hugot na gyud ang desisyon ni Doming nga magpabayad na lang siya ug bahala na daw si Belen kung unsa iya mga plano. Labi na daw kay dunay dakung derby nga moabotay sa ilang siyudad. Ug mao pud ang desisyon ni Mario nga iyahon na si Belen ug siya ang mobayad sa kantidad nga gikinahanglan ni Doming ug namulong pa nga gihigugma niya si Belen. Saksi ang tanang tawo nga naa sa palibot (kay daghan man nagtapok sa maong away, sa may beach man nahitabo ni nga away). Busa mitingog na si Ilyong tungod kay isog na kaayo ang duha ka laki ug nagpunay na lang ug hilak si Belen. Gipangutana ni Ilyong si Belen kung unsa iya desisyon.

Naputol ang hinana-ay ug away ni Mario ug Doming sa dihang mitingog ang celphone ni Mario, ug si Minerba diay ang nanawag. Dinhi naglibog na ug samot si Mario. Apan si Doming hugot na gyud sa iyang desisyon ug isog na kaayo nga magpabayad na lang gyud bahala ug hulog-hulugan lang daw..

Sa dihang motingog na unta si Belen, miabot ang iyang amahan nga nagsamparay sa kahubog… sa kaulaw ug kapungot midagan palayo ug mipauli na lang ang dalaga nga walay tingog tingog.

Unsa kaha ang angay nga buhaton ni Belen? Husto
ba sa iyang desisyon si Doming? Si Mario, unsa man usab ang iyang angay nga buhaton? Angay ba nga sultihan ni Mario si Minerba sa hitabo? Unsa ang angay buhaton ni Ilyong? Tabang mga bisdakers…

Mi-langyaw ni karon si Belen aron sa paglikay sa kaulaw ug pagpaalim sa sakit sa dughan.

Matinahuron nga magtatampo,

Suod nga Higala ni Mario…


PS: pwede request kanta nga Lingin, Lagkaw ug Gugma vs Kwarta

Salamat

12 December 2009