Nabuang sa majong

ADMIN: Email ug tinuod nga pangalan gitago
-----------------------------------------------------

Nagpadala: Boning - Dubai

Dawata ang akong mainitong pagtimbaya sa mga kaliwat ni Lapu-lapu. labi na gayud sa akong gitahud nga tigdumala niining talagsaon nga payag sa sigpukot kon internet nga si Abai Rolly

Bai dako nakong pasalamat niining imong gihagoan nga payag diin kitang mga Bisaya nahatagan ug higayon nga magkahimamat ug mag ila ug magpalambo sa kaugalingong kultura.

Ako diay sai Abai Boning, nga taga Cebu, minyo, usa ang anak, ug ania nanimpalad sa Dubai. Tingali ug mahibulong kamo sa kaladlum sa akong mga pinulungan kay ako kining nasunod sa akong amahan nga sakop sa LUDABI ang pundok nga nagpalambo ug nagtuki sa pinulonga'ng bisaya.

Bisan sa kabaghoan sa panahon, wala gayud mawala kanako ang pagpasigarbo sa atong kaugalingong pinulungan. Sa makausa pa, daghang salamat Abai Rolly.

Tuguti ako nga mosalmot niining Gugmang Giatay nga maoy gikabuangan karon sa mga "bisyaw" kay nagtuki gayud kini sa mga suliran sa mga sama kanako. Makalingaw ug maka kutlo kita ug pagtulun-an.

Mahitungod kini sa akong kapikas sa kinabuhi nga si Condrada nga manghud nako ug 10 ka tuig. Sa meaging semana, misumbong man gud kanako ang akong inahan kabahin sa akong batan ong mrs nga nabuang na kono sa majongan sa among silingan, ug ang among anak adto kanunay ibilin ni Nanay.

Pirmi na kining makadlawanan pag uli sa balay ug usahay udto na kuhaon ang among anak sa akong inahan kay labihan ang pagkatulog. Walay mahimo akong inahan kay dili gayud siya gusto nga manghilabot sa akong mrs mao ng mipahibalo gayud dayon siya kanako diri sa Dubai.

Sa dihang akong gisukamatan si condrada, gisab-an man hinoon ko sa kanahan nga nganong ako siyang kuhaan sa iyang kalipay. Mas maayo nalang kono ni ang petsas maoy iyang komoton kaysa mokomot siya ug mga buhi sa uban aron pagtambal sa iyang kahidlaw. Dili baya kono lalim nga wala ko sa iyang kiliran kay walay makomot ug mokomot labi na batan pa siya.

Labihan nakong lagota ug nagkaaway gayud kami. akong giingnan nga kung mao na, mouli nalang ko aron maundang imong pagmajong. Apan dili usab sya mosugot kay mag unsa man kono ng makakumot siya sa akong sundang unya wala pud mi kuarta.

Labihang liboga nako bai Rolly kung unsaon ko ni pagsulbad. Kay matud pa ni Condrada nga matagbaw kono siya sa pagkomot sa petsas kay iya sab kono kining hunahunaon nga iyang gikomot ang akong petsas.

Nalooy baya ko niya Bai Rolly pero dili gyud maayo nga mabuang siya sa majong kay tingali ug sa kadugayan dili na petsas sa mahong iyang komoton kon dili ang petsas sa iyang kadula kay kahibalo raba ko sa akong mga silingan nga majongiro kay pagka dokirok gayud.

Dinhi nalang ako kutob ug manghinaut ako nga inyong patalnghugan kining akong Gugmang Gikumot.

Boning - Dubai