Gugmang Nagmahay

Nagpadala: Sunshine
Dapit : Japan

Kumusta mga bisdak ug labi na kanimo Abai Rolly. Una sa tanan salamat diay aning imong site nga maoy akong suroyanan matag adunay higayon.

Makapawa sa kalaay labi na kay dia ako gawas sa nasud.

Tawaga lang ko ug ngalan nga Sunshine, dia ko sa Japan nagtrabaho, pero wala ko sa pocketbell. Kahibaw na siguro ka bai unsay pasabot ana bai.

Taga Leyte gyud ko bai, duna akoy usa ka anak didto nga akong gibilin sa akong bana. Usa man gud nganong naaghat ko ug ari sa Japan tungod sa akong bana nga si Pogi nga kalit lang nausab.

Sa bag-o pa kami, sweet kaayo mi ug caring kaayo siya nako. Apan niadtong nakaanak nako, kalit siyang nabuang sa sugal nga baraha kay nadani sa iyang mga amigo. Nagsalig man gud ni si Pogi nga pinadalhan ko sa akong sister ug monthly nga tabang kay naa man siya sa Europe naminyo ug foreigner. Ako pud dunay gamay nga negosyo samtang si Pogi tabang tabang nako.

Didto siya nagsugod ug kausab, pirmi nalang kulang among kuarta tungod sa sugal. Moandar kung dili nako tagaan ug puhunan. Moinum na siya dayon hubog mouli sa balay, ug akoy pahimungtan labi na ug pildiro, kay daw sama sa loguson gyud ako bisan wala koy gusto kay dili lalim ng makig dulog kita ug hubog.

At first ok rako kay wild man gyud basta hubog si Pogi. Apan nagkadugay kay para iya raman pirmi ug dili nako hulaton kay makatulog siya inig human niya. Mao ng mag away nami pirmi kung hubog siya kay mamugos gyud ug wala nakoy gana hangtud iya nakong pasakitan kung mobalibad.

Giingnan nako sa akong sister nga pabyaan na si Pogi, aron makaamgo, apan love man gyud ni nako ang kanahan. Ambot ba, maghilak ko sa panahon nga pasakitan ko kung mobalibad sa kama. Pero inig kahuman mahanaw man lang pud akong kalagot niya kay inig mahuwasan maayo kaayo moparayeg nako ug mangayo ug pasaylo si Pogi.

Apan last year wala nako kaantos, gitabangan ko sa akong sister ug milarga ko diri sa Japan aron motrabaho. Misugot man lang sab si Pogi nga ang bata adto sa akong ginikanan basta padad an lang siya nako ug sustento para sa iyang bisyo. Misugot nalang pud ko aron wala nay samok.

Tuod man sa diri nako sa Japan diha akoy nakaila sa online nga si Ondoy, usa ka bisaya nga taga Cebu. buwag usab sa asawa nga dili kasado, Naa siya sa Canada nagtrabaho ug citizen na, duna siyay usa ka anak nga tua pud sa Cebu kay giprocess pa ang papeles.

Tungod sa among kasuod, nagkauyab gayud kami, ug gisaaran nako niya nga iya kono kong kuhaon gikan sa akong bana inig panguli namo sa Pinas sometime next year ug dad-on sa Canada.

Labihan namong ka sweet sa online ug gipabuhagay na ang tanan kay dili man mahimo ni si Ondoy nga dili ka cam to cam nako. Ingon tang punga labihan na namong kasuod.

Excited napud kaayo ko sa among panagkita next year kay adtoon ko niya sa Leyte aron makig estorya sa akong bana sa among plano.

Apan kalit akong nahugno ning bulana sa diha kalit siyang nausab. Tagsa nalang siyang mocontak nako ug kung akong contakon dili motubag si Ondoy. Magsige lang ug bilin ug message nga busy kono siya sa iyang pag prepare para uli next year. Too lang pud ko at first.

Apan nagkadugay wala na gayud siya'y contact nako. Labihan nakong hilaka ug guola kay napakyas napud ko sa akong gugma. Labi na kay may nakasulti nako nga si Ondoy kaslonon na diay next year ug laing babaye nga iyang nauyab pud sa online. Duna man gud koy kaila sa online nga kaila pud ni Ondoy.

Kapait sa akong gidangatan. Matinud anon ko sa mga lalaki apan dili man sila matinud anon nako bai Rolly.

Si pogi mao gihapon, si ondoy mao gihapon. Nihit na ba gayud ang lalaking tarong niining kalibotan? Nganong kusug man kaayo silang mosaad unya ilang pakyason.

Asa nalang kaha ko ani no? Manghinaot lang ko nga kining akong sugilanon makahatag ug lesson sa mga kabaybayn-an nga dili dali daling mosalig sa mga matam is nga pulong ug saad sa mga kalalakin an labi na gayud sa online.

More power to Radyo Bisdak!

Magtatampo,

Sunshine
Japan